2Cor 7 | GbrGAW | STEP | Ntu n na alkawali dnagmayi ɓo n na a cei gayi nyi, omi a nugundo ye-ye-yi, yi la awye pmi ya n ɓonukwoyi doho-doho yi, Ko dna n zafun, ya ze yihin a gyi-gyi-yi, ya zan-zan n Shekwoyi dnawoyi, yi ga yihin tukwo n wo akun.

2 Corinthians 7

1 Ntu n na alkawali dnagmayi ɓo n na a cei gayi nyi, omi a nugundo ye-ye-yi, yi la awye pmi ya n ɓonukwoyi doho-doho yi, Ko dna n zafun, ya ze yihin a gyi-gyi-yi, ya zan-zan n Shekwoyi dnawoyi, yi ga yihin tukwo n wo akun. 2 Yi gyi fye wye fye la abugba guya gayi njesun, ntuge yi to zhin zaho ɓenukwoyi nfyemin, yi to dna zaho zokwo nukwoyin, yi to gyi zaho fin nfyem. 3 Mi ta da ɓeye ntuge ma kpe fye agye num, ko ma zun fye knim, gama shi mi ku shinda nyi, fye filo n mi bugba har abada, ma pwo kwo ma fi ɓedo n fyei. 4 Mi n bugba kalayi lo nfye nmwa, mi gma nfyei n mwa, fye la bugba kala ga mi n mwa, fye la bugba buyi gami ko shi ko nyi mi ku wahala sin n mwa.

San-san Ɓa Mi Kwa Ɓe N Kagna Yi

5 Esa n yi ɓei si Makidoniya, yi to ɓei shegun yi n bwa doho-doho yi, n yi mi eyi abugba ɓei nunuyi n vi-vin yi n dnayi. 6 Shekwoyi n wo fu abugba bma-bmayi ya nyi, wa fu yi bugba n Titus ɓe-ɓe-yi. 7 Owo ɓe-ɓe nu to gayi bugba buyi gmanyin, ama nabari manayi n wa ɓe yi n cei nfye tukwo nyi. Esa n wo ɓei gna mi ge fye ɓei shi omi ɓeɓe awye, shi bugba ɓei wun fye n tu nya ɓo n kwo ɓei zhin nyi. Nfye ɓovi, n ye-yeyi nfye n cei lo-lo n mi ɓo nyi, mi ɓei la nu n bugba buyi har koyi gyi ya.

8 Bugba ta wun mi lo nge mi ɓei tnu fye n wasika yin, kwo shi bugba ɓei la mi wun nsaho yi, mi yi pa shi kwo ɓa san fye, ama kwa san fye esa fyewyi nu kawai. 9 Nsayi ye a dami lo, shi mi ɓei tnu n koyi, to ge shi kwo ɓei kni fye bugban, ama ntu ge okwo san-san n la fye pmi awye wu n Shekwoyi bwa. Bugba wun manayi nu nfye ɓei zhin, bugba-wun pya n Shekwoyi n cei pma owo aza ɓa bwa, na bayi n mi ta shan fye aba ɓe n minagyi yim. 10 Gama nsahoyi Shekwoyi zhin apma, n bugba-wun yi n ya ba, n na bai kwa bma yi zhin, ya pmi awye ya n ɓenukwoyi, ya zan wye-wyeyi nyalo-nyalo nya shin. Bugba to wun yi, ngy shi wa tnu yi n kwoyi m. Ntu ge bugbawun tna-viyi nya to zhin abuye nya num, kwoi ta gni ʼza n efi nyalo-nyalo nya m.

11 Fye gye nya n bugba-wun nkwo gmi n Shekwoyi aba, nku zhin ga fye. Kowi zhin fye, fye ku ze aza gaiciya da, aɓefyece-viyi, fyei zhin atna fya fa laifi nma ka fye nkwo tukwo nyi. Fya wodna nɓei nkwo ɓei zhin nyi, ai wo fye ngye mi ɓe ma bma fye zhin. Fye la kni, fyei la fyehin kun n laifi, shi fya ye fyei ta laifi-da, fye ku ɓo zhin nkwo bmiya.

12 Mi to ka fye ntu ʼza ɓo nu nwa izhin laifi nyim, kwo oza nna zhin wo laifi nyim, ama ntu ge n Dagayi ɓa zhin fya gye, ngye shi fye pa yi ɓo lo n sun.

13 N bugba kalayi nfye ɓei ga yi, nfye ye-yeyi nyi, yi ɓei ku bugba bui-bui bwa n Titus ɓe-ɓeyi, shi fya gwo wo nna gmadayi. 14 To woi lakam, ma ku gna wo ge mi gyi ʼgbe nfyei nu, ofyehin kwa fye to ye ge omi gbegyi kwa ze gbeloyim, ngye shi mi zhin ma gna fye gaiciya ci-ci, Titus nwohin tukwo, wo ku gye ge, omi gbegyi nfyei, kwo zhin gaiciya nu. 15 Wo ye fye n mwa, saho-sahoi nwa pa shi fye ɓei wo owo ɓeda n bugba yi gmanyi fya gwo wo n pwawo-yi, n bugba manayi. 16 Deye da mi bugba lo, shi mi kpelo ge nyaho to dnalo n yi atasin, njesun mi n bugba kalayi lo n fye aba.